Aduna nay dakong potensyal nga maka-generate og dili muminos 90 megawatts sa limpyo, barato, ug sustainable nga suplay sa kuryente ang islang lalawigan sa Bohol sa Central Visayas.
Kini human ang kagamhanang lalawigan sa Bohol kay naka-secure og redundacy system nga makasuplay sa probinsya ug dugang 230 kilovolts sa kuryente nga gikan sa National Grid Corporation of the Philippines (NGCP) Cebu-Bohol Interconnection Project.
Gani si Bohol Provincial Governor Erico Aris Aumentado ang nagdani sa mga investors sa green energy development aron sa pag-generate sa kapin 100 megawatts sa solar power aron sa pag-complement sa hydro-electric generation sa probinsya.
Naglakip kini sa development agenda sa lalawigan para sa sustainable development nga nagsuporta sa mga land-based generation facilities sa tulo (3) ka mga hydro-electric power plants nga nahimotang sa lungsod sa Loboc, Sevilla, ug Balilihan; diesel power plant sa lungsod sa Dampas; 128 kilovolts supply sa Leyte-Bohol Interconnection Project; ug 95.2-megawatts power plant sa Imelda, Ubay.
Kasayran nga sayo rong tuiga, ang Bohol Light Company kay mibalhin na sa tinubdan niini ngadto sa renewable energy sa bag-ong 8-megawatt solar farm nga maoy nagsuplay sa nagpadayong kalamboan sa dakbayan sa Tagbilaran.
Kahinumduman nga niadtong buwan sa Abril, ang 45-megawatt solar facility sa lungsod sa Sevilla kay opisyal nga giablihan nga maoy nag-secure sa 90 megawatts solar power sa lalawigan sa Bohol.
