PROVINCE OF BOHOL-Gikatakda nga mopahigayon ug massive caravan sa pipila ka mga serbisyo sa probinsiya sa Bohol ang Land Transportation Office (LTO) 7, subay sa hangyo ni Governor Aris Aumentado.
Ang caravan sa mga serbisyo maglakip sa pagproseso sa mga aplikasyon sa lisensya sa pagmaneho ug pag-renew, pagrehistro sa sakyanan, ug pagpahigayon sa theoretical driving course, ug uban pa.
Hinuon, wala pa magtakda si LTO-7 Director Victor Emmanuel Caindec sa pinal nga petsa sa ilang caravan of services sa lalawigan sa Bohol.
Apan matud pa nga nagpadayon na ang pagpangandam alang niini.
Misaad kini nga mohimo ug pormal nga pagpahibalo sa schedule sa dili madugay uban sa koordinasyon ni Gobernador Aumentado.
Dugang pa, si Caindec mibutyag nga mihimo usab kini og pasalig sa Cebu Provincial Government alang sa partisipasyon sa LTO-7 sa Provincial Caravan of Services program.
Ang ilang partisipasyon giingong mahimong kabahin usab sa ilang nasudnong ahensiya sa ambisyon ug paningkamot sa paghatod sa 30,000 ka TDC nga scholarship sa Central Visayas sa katapusan sa 2023.
