CENTRAL VISAYAS-Padayon ang paningkamot sa Land Transportation Office (LTO) 7 nga ma-release ang wala ma-claim nga mga plaka sa rehiyon sa Central Visayas.
Hinungdan nga niawhag kini sa mga tag-iya og motorsiklo ug motor nga nagdala og temporaryong plaka sa pagbisita sa labing duol nga buhatan sa LTO aron makuha ang ilang mga plaka.
Kini aron madugangan pag-ayo ang gidaghanon sa mga gipagawas nga wala ma-claim nga mga plaka sa Central Visayas karong tuiga.
Kung diin si LTO 7 Director Glen Galario nihangyo sa publiko nga mobisita sa labing duol nga buhatan sa LTO sa ilang lugar aron maproseso ang pagpagawas sa ilang mga plaka nga wala ma-claim.
Gibutyag usab sa regional director nga kapin sa 100,000 ka mga plaka ang na-claim sa miaging tuig.
Ang datus sa LTO 7 nagpakita nga gikan Hunyo 9, 2023 hangtod Enero 19, 2024, mikabat sa 91,835 ka mga plaka sa motorsiklo ang na-release samtang 13,154 ka mga plaka sa motor ang gi-claim usab sa mga tag-iya sa sakyanan.
Aron maproseso ang pagpagawas sa mga plaka sa mga buhatan sa LTO, ang mga kliyente kinahanglang mopil-ap sa Plate Information Form pinaagi sa PACD ug mosumiter sa ilang kopya sa OR ug CR.
