LAPU-LAPU CITY, CEBU- Nangandam na usab ang Dakbayan sa Lapu-Lapu alang sa umaabot nga ASEAN Tourism Forum sunod semana, hinungdan nga gipahigayon ang Tourism Roundtable Assembly Quarter 1 sa Marina Seaview, Brgy. Ibo, Lapu-Lapu City niadtong Enero 20, 2026.
Ang kalihokan gipangulohan ni City Mayor Hon. Maria Cynthia “Cindi” K. Chan, kauban si Gary Lao, City Tourism Officer, ug mga stakeholders gikan sa sektor sa turismo.
Tumong sa maong assembly ang pagpalig-on sa koordinasyon tali sa lokal nga kagamhanan ug mga stakeholder, ilabina sa mga lakang sa seguridad ug kaluwasan sa publiko subay sa pag-andam alang sa ASEAN Summit 2026.
Gipamatud-an usab sa Lapu-Lapu City Police Office (LCPO) ang ilang lig-on nga pasalig sa pagsiguro sa luwas ug seguradong palibot alang sa lokal ug internasyonal nga mga bisita.
Sumala ni Police Colonel Antonietto Cañete, officer-in-charge sa LCPO, magpatuman ang kapulisan og security packages gikan sa pag-abot sa mga delegasyon sa Mactan-Cebu International Airport hangtod sa ilang pagbiya pabalik sa ilang tagsa-tagsa ka nasud.
Kapin sa 800 ka pulis gikan sa LCPO ang i-deploy, ug matud pa ni Cañete, igo na ang kasamtangang pwersa ug wala pa silay gihangyo nga dugang nga augmentation.
Dugang pa, 40 ka personnel gikan sa City Traffic Management System, 36 ka personnel sa Bureau of Fire Protection, ug 68 ka personnel sa City Disaster Risk Reduction and Management Office ang motabang sa seguridad.
Sa kinatibuk-an, mga 1,000 ka security personnel ang i-deploy aron masiguro ang kalinaw ug kahapsay atol sa kalihokan.
