LAPU-LAPU CITY-Andam na ang kapulisan sa dakbayan sa Lapu-Lapu alang sa paghatag ug hugot nga seguridad sa paghandom sa adlaw sa mga Santos ug Kalag.
Gipahibalo ni Lapu-Lapu City Police Office Director (LLCPO) Police Colonel Clarito Baha nga sugod Oktubre 31 ipakatap na niini ang kapin 200 ka mga police personnel sa mga dagku nga sam-ang sa dakbayan lakip na sa usa ka sam-ang sa Olanggo Island.
Matud ni PCol. Baha nga gawas sa iyahang mga personnel aduna usa’y mga barangay tanod isip mga force multiplier ang mutabang sa pagbantay sa seguridad.
Gidugang pa niini nga sulod sa mga sam-ang adunay police assistance desk nga mahimong kaduolan sa publiko.
Samtang, mipahimangno si Col. Baha sa publiko nga dili magdala ug mga ilimnon nga makahubog, sound system, ingun man mga ha-it nga hinagiban sulod sa sam-ang. Nangayo kini ug pagsabot sa publiko sa ilahang hugot nga pagpatuman sa seguridad ug giingung alang lang usab kini sa kaluwasan sa tanan. (SBR)
