CENTRAL VISAYAS-Nakuha sa usa ka 17-anyos nga babaye sa Central Visayas, nga si Asia Paraase, ang unang bulawang medalya sa Palarong Pambansa 2024, karong adlawa, Hulyo 11, 2024.
Si Paraase gikan sa Lapu-Lapu City maoy midaog sa 3,000 m run secondary girls sa Cebu City Sports Center ( CCSC).
Sa pakighinabi sa Bombo Newsteam kang Paraase , iyahang gipa-ambit nga nalipay kini gumikan kay ang iyahang kadaugan dili lamang alang sa Dakbayan sa Lapu-Lapu, kundili garbo usab kini sa Central Visayas.
Matud niini nga iyahang gipahinungod ang iyahang kadaugan sa iyahang kaugaligun, kana gumuikan kay sa kadaghang mga hagit nga nasugatan niini, nawad-an kinig paglaom sa iyahang kaugalingon.
Dugang pa, nga nalipay kini nga nakakitag paagi nga dili ma-dala sa kakulba ug kahadlok.
Niapil na si Asia sa athletics sukad sa Grade 6 ug kini ang iyahanag ikaduhang higayon sa National Games ug ang unang higayon nga nakadaog siya og gold medal.
Si Asia Paraase, gikan sa Pajo National High School sa dakbayan sa Lapu-Lapu, hinayhinay nang nakab-ot ang iyang pangandoy nga dalhon ang bandera sa Pilipinas sa mga international competitions sa dihang midaog siya sa 3000 meter run sa Athletics ug nakadaog sa unang bulawang medalya alang sa 2024 National Games.
Human makuha ang bulawang medalya sa 2024 Palarong Pambansa, tumong ni Asia nga ipadayon ang pangandoy nga makarepresentar sa Pilipinas sa Asian Games ug Youth Games.
