CEBU – Gibutyag sa pangulo sa City Intelligence Unit (CIU) sa Lapu-Lapu City Police Office nga mokabat sa 42 kilos nga gituohang shabu ang ilang nasakmit gikan sa iyang pag-asumir sa katungdanan 10 ka buwan na ang nakalabay.
Kini ang gibutyag ni CIU head Police Lieutenant Colonel Jul Muhammad Jamiri, nga 41 kilos sa kinatibuk-ang paghakot sa drugas ang nasakmit sa unom ka buy-bust operations.
Gipasabot ni Jamiri nga sa unang pipila ka buwan sa iyang bag-ong assignment, nadakpan ra nila ang mga small-time drug dealer hangtod nga nadakpan na nila ang mga big-time drug personalities base sa impormasyon nga gihatag sa ilang mga dinakpan.
Lakip sa labing dakong drug haul mao ang lima ka kilo nga gituohang shabu nga mobalor og P34 milyones nga ilang nasakmit gikan kang Rosell Morales Arda atol sa raid niadtong Biyernes sa hapon, Oktubre 14, 2022 sa ML Quezon Street, Barangay Ibo.
Matud ni Jamiri nga gikan sa Luzon ang ilang suplay sa drugas, samtang ang uban gikan sa Mindanao.
Katulo ka higayon nga nihimo og transaksiyon sa ilegal nga drugas ang kapulisan kang Arda una nila kini nasikop.
Nagtuo si Jamiri nga usa sa mga rason nga ganahan ang mga drug pusher nga mag-operate sa dakbayan sa Lapu-lapu tungod kay mas mahal ang presyo sa illegal nga butang sa naasoyng lugar kay sa ubang mga dapit.
