CEBU – Nagtanyag og libreng sakay ang Lapu-Lapu City Government alang sa mga sumasakay ubos sa ilang Libreng Sakay nga programa.
Sa Facebook post, si Mayor Junard “Ahong” Chan niingon nga kini gihimo aron matabangan ang mga pasahero nga makasagubang sa epekto sa pagsaka sa presyo sa gasolina.
Tungod sa pagsaka sa presyo sa gasolina, adunay pipila ka mga Oponganon nga dili na gustong mogawas aron mobuhat og importanteng buluhaton ug adunay mga pampublikong sakyanan nga wala na moagi sa ilang mga rota. Tungod niini, atong ipakatap ang atong mga ‘Libreng Sakay’ nga mga bus nga moagi sa mga nag-unang rota sa dakbayan aron magdala og mga pasahero sa ilang destinasyon.
Sa pagkakaron, adunay lima ka mga bus ang dakbayan sa Lapu-Lapu. Hinuon, ang tulo niini gamiton lang alang sa Libreng Sakay nga programa, samtang ang nahabilin nga duha gamiton alang sa serbisyo sa lubong kung mangayo og tabang.
Gipasalig ni Chan sa riding public nga ang mga bus nga nagtanyag og libreng sakay para sa tanan apan gipahinumdoman nga bawal ang overloading.
Kini nga mga bus kay para sa tanang Oponganon, ug ang mga bus nga moagi sa kadalanan kinahanglan lang nga magsiguro nga wala’y overloading sa mga pasahero.
