Napalgan ug na ilhan na ang tanang lawas sa 5 ka mga minero nga natanggong sa usa ka nahugno nga shaft, nga usa sa labing dako nga underground nga minahan sa copper sa tibuok kalibutan, sumala sa opisyal niadtong Domingo.
Gikabutyag ni Aquiles Cubillos ang pangu sa Chile’s O’Higgins region, nga ang lawas ni Moises Pavez mao ang katapusang minero na nagpabiling nahanaw, ug nakit-an pasado alas 3:30 sa hapon, diin ang mga rescue team, nag-drill sa dose ka metros nga bato aron maabot ang mga natangganong nga mga trabahanteng minero.
Ang lima ka mga minero natanggong sa lawom nga sulod sa El Teniente nga minahan sa Chile niadto pang Huwebes, Hulyo 31, human ang usa ka seksyon sa minahan nahugno nunot sa pagtay-og sa 4.2 magnitude nga linog nga diha-diha nipatay sa laing minero ug nakaangol sa laing siyam ka mga trabahante niini.
Subay niini, nakaplagan ang mga natanggong nga mga minero gamit ang GPS device apan, ang mga rescue teams wala nagmalamopuson nakakumonikar sa mga biktima.
Nunot sa panghitabo, gipansusi na sa awtoridad kung natural o normal ba ang linog o kung ang kalihokan sa pagmina sa El Teniente ang hinungdan sa linog.
Samtang naglunsad usab og kriminal nga imbestigasyon ang mga prosecutors sa Chile aron matino kung nalapas ba ang bisan unsang mga sumbanan sa kaluwasan.
Ang El Teniente nga minahan anaa nahimutang sa kabukiran sa Andes sa sentro sa Chile, ug mao kini ang pinakadako nga minahan sa copper sa ilawom sa yuta ug gipanag-iya sa kompanya sa estado sa Chile nga Codelco.
Natataw usab nga sa wala madugay human sa pagkahugno niadtong Huwebes, gipahunong sa Codelco ang mga operasyon sa apektadong bahin sa minahan ug gipabakwit ang 3,000 ka indibidwal gikan sa mas lapad nga dapit ug sa luwas nga mga dapit.
