Nagpasalamat ang kompositor sa kantang “LDR” sa tanang mga Sugbuanon human nga nakadaug kini isip 2nd runner up sa malampuson nga 3rd National Bombo Music Festival.
Matud sa garbo sa Consolacion nga si Jose LG Fuentes nga wala kini nagdahum sa iyang naangkon nga kalampusan ilabi na nga nakadaug usab kini isip Best Interpreter.
Gawas sa naangkong kadaugan, nalipay usab kini human nga nadungog sa tibuok kalibutan ang iyang orihinal nga komposisyon diin naghisgut kini sa “long distance relationship.”
Gihalad ni Fuentes ang iyang pagkadaug sa tanang mga Cebuano, ingon man sa balaang bata nga si Señor Sto. Niño.
Mitambag kini sa mga nangandoy nga mahimong successful nga musikero nga ipagawas ang tinaguan apan hinaguang komposisyon pinaagi sa pagsalmot sa mga songwriting competitions, sama lang sa tinuig nga Bombo Music Festival.
Napaglantawan usab ni Fuentes nga sama kaniya, daghang mga Sugbuanon ang maayong mohimo og kanta ug nahatagan usab og luna sa industriya.
‘Deserving ang LDR’
Samtang gidayeg sa Magsaysay Awardee for Music nga si Ryan Cayabyab ang maayong performance ni Fuentes maong deserving, alang kaniya, ang pagkadaug isip Best Interpreter.
Matud ni Cayabyab nga komportable ug natural kaayo ang taga-Consolacion sa pagbatbat sa iyang kanta kagabii.
Tungod niini, nakita usab ni “Mr. C” nga nag-enjoy si Fuentes sa pagkanta sa orihinal nga komposisyong “LDR.”
