CEBU CITY- Aprobado na ang repormadong ordinansa kalabot sa Quarterly Cash assistance sa mga Senior Citizens ug pagtugot sa authorization letter niini alang sa mga miyembro nga anaa gawas sa Sugbo.
Kini human nga wala mapirmahi ni Cebu City Mayor Nestor Archival, ang maong ordinansa, diin kaniadto nga ipang-apud-apod ang Senior Citizen Assistance matag-buwan apan karon gihimo nang by-quarter.
Matud ni Cebu City Councilor Jun Alcover, nga gumikan kay wala kini mapirmahi sa Mayor sulod sa 10 ka adlaw, awtomatiko kining mahimong epektibo human sa 15 ka adlaw nga pagpakatap niini sa mga pamantalaan.
Sigon ni Alcover, nga tugotan na usab sa kagamhanan sa dakbayan sa Sugbo ang pagpanawat sa mga authorization letter gikan sa mga miyembro niini nga wala sa dakbayan, hilabi na sa mga benepisyaryo nga anaa sa gawas sa nasud o namuyo gawas sa dakbayan apan rehistrado sa siyudad.
Nakadugang usab sa kalangay sa pagka-epektibo sa ordinansa mao ang sunod-sunod nga mga adlaw nga walay trabaho, hinungdan nga nalangay kini hangtud karon.
Kahinumdoman, gisumiter ang maong ordinansa sa Office of the City Mayor niadtong Marso 18, 2026 og napaso na kini niadtong Marso 28, 2026 hinungdan nga makonsiderar kini nga epektibo human sa pagpapublikar niini.
