Nangayo og pagtugot si Atty. Nicholas Kaufman nga mobiya na isip lead counsel ni kanhi Presidente Rodrigo Duterte sa giatubang niining kaso nga crimes against humanity didto sa International Criminal Court (ICC).
Pinaagi sa usa ka pormal nga hangyo, gipahibalo ni Kaufman ang iyang tinguha nga mo-withdraw na sa maong kaso, butang nga nakamugna karon og dugang atensyon sa legal nga dagan sa imbestigasyon batok sa kanhi lider nasod.
Wala pa hinuon gibutyag ang lawom nga rason luyo sa maong lakang ni Kaufman, kinsa maoy nag-unang nagdumala sa depensa ni Duterte sa mga alegasyon niini.
Tungod niini, nagpabilin karong pangutana kon kinsa ang mopuli sa iyang dapit o kon duna ba kini epekto sa tulin sa kaso nga giatubang ni FPRRD sa maong internasyonal nga korte.
Kahinumduman nga si Duterte padayong naggunit sa baruganan nga walay hurisdiksyon ang ICC sa Pilipinas, apan ang maong kalamboan sa iyang legal team gilauman nga maghatag og bag-ong direksyon sa maong kontrobersyal nga isyu.
