Liboan ka mga Palestinian ang nagsugod na sa pagpauli sa ilang mga pinuy-anan sa amihanang Gaza human ang ceasefire tali sa Israel ug Hamas hingpit nga miepekto niadtong Biyernes, Oktubre 10.
Daghang mga Palestino ang mapailobong naglakaw subay sa taas ug abogon nga dalan gikan sa habagatan ngadto sa amihanang Gaza, nga nagdala sa ilang mga bagahe diin ang uban nagbisikleta o nagsakay sa sakyanan.
Bisan pa makaplagan nila ang ilang mga balay nga naguba sa duha ka tuig nga gubat, kini usa ka kahupayan alang kanila nga sa katapusan makabalik sa ilang mga balay ug naglaum nga kini ang sinugdanan sa usa ka tinoud nga katapusan sa gubat.
Alang sa daghang mga residente sa amihanang Gaza, kini ang ilang ikaduhang pagsulay sa pagpauli sa ilang mga balay sukad sa katapusang ceasefire agreement kaniadtong Enero.
Sumala sa tigpamaba sa Israeli Defense Forces (IDF), ang mga Palestinong gitugotan sa pagbalik gikan sa habagatan ngadto sa amihanan pinaagi sa pag-agi duol sa baybayon sa Al-Rashid Street ug Salah al-Din nga dalan sa sentro sa Gaza Strip.
Ang tigpamaba sa Civil Defense sa Gaza nga si Mahmud Bassal mikompirmar nga mga 200,000 ka mga Palestinian ang mibalik sa amihanang Gaza sukad nga natuman ang bag-ong ceasefire.
Sa laing bahin, usa ka oras human nagsugod ang ceasefire sa Gaza, ang Prime Minister sa Israel nga si Benjamin Netanyahu miingon nga human sa duha ka tuig nga pakig-away aron makab-ot ang ilang mga tumong sa gubat, hapit na nila makab-ot ang usa sa ilang pinakadakong tumong, ug kana mao ang pagpabalik sa mga binilanggo sa Hamas, ma-patay man o buhi.
Miingon sila nga dili unta nila kini makab-ot, kung wala ang bililhon nga tabang sa Presidente sa US nga si Donald Trump ug sa iyang mga kawani nga makugihong nagtrabaho aron makab-ot ang ceasefire tali nila ug sa Hamas.
