Nasakmit sa mga sakop sa Cebu City Police Office (CCPO) ug Bureau of Internal Revenue Regional Revenue Office 13 (BIR-RR13) Central Visayas ang kinahon sa mga smuggled nga mga sigarilyo sulod sa duha ka managlahing tindahan sa Barangay Inayawan ug Ermita ning dakbayan sa Sugbo niadtong adlaw sa Huwebes, Pebrero 19, 2026.
Liboan sa mga counterfeit ug smuggled nga sigarilyo ang nahipos sa joint operation sa mga operatiba sa BIR ug CCPO sa usa ka tindahan sa Sitio Lomboy, Barangay Inayawan ning dakbayan sa Sugbo diin nasuta nila kining illicit tungod sa kawalay tax stamps sa packaging sa maong produkto nga dakong kalapasan sa lagda sa buhis sa nasud.
Gani, ipaubos sa BIR sa evaluation ang mga nasakmit nga mga produkto aron kwentahon ang mga backdue taxes sa mga smuggled nga sigarilyo aron dugang impormasyon sa ipasakang kaso batok sa mga responsible sa illegal nga kalihokan.
Samtang, laing operasyon sab ang gilusad sa mga awtoridad sa usa ka tindahan sa dalan Magallanes, Barangay Ermita ning dakbayan sa Sugbo diin liboan sab sa mga smuggled nga sigarilyo ang naronda ug gisakmit.
Sa pamahayag na ni Police Col. George Ylanan, ang City Director sa CCPO nga tanang istasyon sa kapulisan sa dakbayan ang naka-alerto sa maong covert operation batok smuggled cigarettes.
