CEBU CITY-Patay ang usa ka libud-suroy nga lalaki human kini maligsan og motorsiklo ug Sports Utility Vehicle (SUV) sa kadalanan sa Cebu South Coastal Road sa South Road Properties, Barangay Mambaling ning dakbayan sa Sugbo niadtong Sabado sa hapon, Pebrero 1, 2025.
Gikatahong unang naligsan ang biktima sa usa ka motorsiklo nga gimaneho sa usa ka Koreano dayon na nadaganan og usa ka SUV nga gimaneho sa usa ka babaye.
Matod pa sa usa ka personahe sa Cebu City Transportation Office (CCTO) kay gikatahong magsuroyay sa delikadong hawan nga kadalanan sa SRP ang biktima nga manlimosay.
Dugang pa nga napalgan nalang kini natumba na ang Koreanong nagmaneho og motorsiklo sa niadtong higayona nga ang biktima naghegda nalang sa inner lane sa maong dalan.
Ingon man nga ang babayeng drayber sab sa SUV kay wala kabantay sa maong lalaki hinungdan nga nadaganan pud niya kini.
Daling gidagan sa tambalanan ang Koreano ug ang biktima diin nasuta nga dead-on-arrival na kini nga hangtod karon wlaa gihapon maili sa mga awtoridad.
Nakaangkon kini og dagkong samad sa ulo ug lawas hinungdan sa iyang hinadaling kamatayon.
Ang Koreano giilang si Youngil Choi, 48-anyos ug lumulupyo sa Barangay San Roque dakbayan sa Talisay samtang ang SUV driver kay giilang si Luke Shannen Peroma, 21-anyos ug lumulupyo sa lungsod sa Minglanilla.
Nanawagan karon sa publiko ang Traffic Enforcement Unit sa Cebu City Police Office (CCPO) sa paghatag og kasayuran kung kinsa ang kabanay sa biktima aron makapasaka og kaso batok sa mga drayber ug pagpahiluna sa patayng lawas niini.
Kasong reckless imprudence resulting in homicide ug damage to property ang posibling atubangon sa mga sad-an sa aksidente.
