LAPU-LAPU CITY, CEBU- Gipang-apod-apod na ngadto sa nagkadaiyang barangay ug police stations sa dakbayan sa Lapu-Lapu ang mga bag-ong motorsiklo uban ang mga accessories niini isip ganti sa ilang maayong serbisyo ug alang sa pagpalig-on sa seguridad sa dakbayan.
Gipahibalo ni Mayor Cindi King Chan nga ang maong mga ekipo nadawat sa lima ka mga barangay nga nakakuha sa prestihiyosong “Seal of Good Local Governance (SGLG)” award nga naglakip sa Brgy. Basak, Calawisan, Caw-oy, Punta Engaño, ug Subabasbas.
Lakip usab sa nakadawat sa maong mga sakyanan mao ang Station 1 hangtod sa Station 5 sa Lapu-Lapu City Police Office lakip na ang traffic unit sa syudad aron mas mapalambo pa ang ilang operasyon.
Tumong niining maong inisyatiba nga mas mapaspasan ang pagtubag sa bisan unsang emerhensya ug masiguro ang kalinaw ug kahapsay sa tibuok Lapu-Lapu.
Ang paghatag niining maong mga motorsiklo nagsilbing pag-ila sa kakugi sa mga opisyal sa barangay ug kapulisan sa paghatag og de-kalidad nga serbisyo ngadto sa mga Oponganon.
Pinaagi niining mga bag-ong kahimanan, gilauman nga mas magmadasigon pa ang mga otoridad sa pagpatuman sa balaod ug sa pagserbisyo sa publiko sa matag adlaw.
