Gikatakda nga ipresentar ni Cebu Governor Pamela Baricuatro ang lima ka dagkong proyekto sa imprastraktura ngadto sa Opisina sa Presidente lakip na ang ubang mga inisyatibo sama sa Regional Investment Plan.
Gikumpirmar ni Provincial Assistant Administrator Aldwin Empaces ang maong kalamboan diin giingong gihangyo sa gobernadora ang top 5 sa “mega infrastructure projects” para sa mga paningkamot sa rehabilitasyon ug pagbangon sa Cebu ubos sa Build Back Better framework
Kini pormal nga ipresentar sa usa ka miting nga giorganisar sa Department of Economy, Planning and Development uban sa nagkalain-laing mga ahensya sa nasud karong umaabot nga Nobyembre 26.
Lakip sa lima ka proyekto mao ang dugay nang nalangan nga Integrated Water Management Project, nga gilauman sa mga opisyal, nga sa katapusan makakuha og pondo human kini gigahin sa miaging mga tuig.
Ingon man nga aduna pa’y duha ka mga proyekto ang giila ang naglakip sa coastal diversion road gikan sa Dakbayan sa Talisay hangtod sa Dakbayan sa Naga ug mga inisyatibo sa pagpaospital nga nagtumong sa pagpalambo sa mga pasilidad sa panglawas sa probinsya.
Nasayran usab nga adunay usa ka feasibility study alang sa diversion road ang gikatakdang mahuman sa Hunyo 2026.
Gidugang pa ni Empaces nga mga dagkong component sa proyekto sa Talisay-Naga mahimong ipadayon uban sa kasamtangang mga flagship road developments, sama sa bypass road gikan sa Consolacion hangtod sa Liloan, ug ang nahibiling duha ka proyekto kay wala pa matino sa Kapitolyo.
