CORDOVA,CEBU- Nagmalampuson ang gihimong rescue ug entrapment operation sa mga sakop sa Provincial Intelligence Unit – Cebu Police Provincial Office (PIU-CPPO) nga mitumong sa pagluwas sa usa ka Children in Conflict with the Law (CICL) ug lima ka minor de edad nga giingong biktima sa sexual exploitation ug prostitusyon, nga usa ka kalapasan sa Republic Act 11862 o Expanded Anti-Trafficking in Persons Act of 2022.
Base sa imbestigasyon, ang operasyon gihimo sa alas 10:30 sa gabii, Setyembre 19, 2025, sa Red Gate Inn, Barangay Poblacion, Cordova.
Pinangulohan ni PLTCOL Joseph Cruz Carlit, ang maong operasyon gipasiugdahan sa PIU-CPPO ilawom sa direktiba ni PCOL Abubakar Udang Mangelen Jr., Officer-in-Charge sa CPPO.
Kauban sa operasyon ang Women and Children Protection Desk (WCPD-CPPO) nga gipangulohan ni PLT Ritchil M. Tesoro, Cordova MPS head PMAJ John Khalev Sanchez, uban sa mga personnel sa Cebu Provincial Social Welfare and Development Office (PSWDO) ug sa Women and Children Protection Center – Visayas Field Unit 7 (WCPC-VFU7).
Gisaysay nga ang maong operasyon resulta sa intel-driven law enforcement activity batok sa giingong pagpang-hire ug exploitation sa mga menor de edad alang sa commercial sexual exploitation
Naluwas sa operasyon ang usa ka 16-anyos nga CICL, babaye, nga residente sa Barangay Pilipog, Cordova, ug lima pa ka mga menor de edad nga giingong gi-exploit sa sexual trade.
Human sa operasyon, ang mga biktima, lakip ang CICL, gidalit sa Center for Women and Children sa DSWD Field Office VII sa Barangay Carreta, Cebu City, alang sa hustong pag-atiman, psychosocial intervention, ug legal assistance.
Ang kapulisan nagpadayon sa imbestigasyon aron maila ug masikop ang mga responsable sa maong krimen.
Misaad ang CPPO sa padayon nga kampanya batok sa human trafficking ug sexual exploitation, ilabi na sa mga kabataan.
