Napili isip bag-ong presidente sa Catholic Bishops’ Conference of the Philippines (CBCP) si Archbishop Gilbert Garcera sa Lipa atol sa 130th Plenary Assembly sa grupo nga gipahigayon sa Anda, Bohol.
Siya ang mopuli kang Cardinal Pablo Virgilio David sa Kalookan, kinsa motapos sa iyang ikaduhang termino sa Nobyembre 2025.
Pormal nga mo-asumir sa posisyon karong Disyembre 1, 2025 ai Garcera, alang sa duha ka tuig nga termino.
Sumala sa pagpanukiduki sa Bombo Radyo, nasayran nga si Bishop Garcera natawo niadtong Pebrero 2, 1959 sa Magarao, Camarines Sur.
Naordinahan isip pari niadtong 1983 alang sa Archdiocese of Caceres, nagserbisyo siya isip obispo sa Daet gikan 2007 hangtod 2017.
Gitudlo siya nga Arsobispo sa Lipa kaniadtong 2017, nga adunay kongregasyon nga kapin sa 3.3 milyon nga mga parokyahanon.
Nagserbisyo usab siya isip tsirman sa CBCP Commission on Mission ug Commission on Family and Life, ug kabahin sa CBCP Permanent Council isip representante sa Southeast Luzon.
Naghupot siya og doctorate sa Organization Development gikan sa Southeast Asia Interdisciplinary Development Institute Graduate School of Organization Development and Planning ug master’s degree sa Religious Studies gikan sa Ateneo de Manila.
Isip bag-ong pangulo sa CBCP, si Garcera gilauman nga manguna sa mga obispo sa moral, pastoral, ug pangkatilingban nga mga isyu, samtang nagpalawom sa konsultasyon sa mga layko ubos sa synodal journey sa Roman Katolikong Simbahan.
Nakadawat og pahalipay gikan sa iyang mga kaubang pari ug mga residente sa mga lalawigan sa Camarines si Garcera diin siya gikan ug dugay nang nagserbisyo.
