Nahimong mainiton nga hisgutanan sa social media ang bag-ong pagkitaay sa miyembro sa BLACKPINK nga si Lisa ug sa Thai actor nga si Blue Pongtiwat.
Namatikdan sa mga fans nga nag-uban ang duha sa Bangkok, Thailand.
Sa milabay nga mga adlaw, nakita usab sila nga nagdungan og kaon sa usa ka restawran sa maong siyudad.
Niadtong Setyembre, mikaylap usab sa social media ang mga litrato ug video nga nagpakita sa duha samtang nagbakasyon sa London.
Ang aktor, nga tulo ka tuig nga mas bata kaysa kang Lisa, nailhan sa iyang pagpakita sa nagkalain-laing pelikula ug serye, lakip na ang “Ready, Set, Love”.
Kahinumdoman nga aduna nay mga taho kaniadto nga naghisgot bahin sa panagbulag ni Lisa ug sa negosyante nga si Frédéric Arnault, anak ni Bernard Arnault, ang chairman sa LVMH.
