SOUTH KOREA-Gitawag sa igsoon ni North Korean lider nga si Kim Jong Un ang live fire drill sa South Korea nga ‘suicidal hysteria’, samtang nagpasidaan nga ang South mag-atubang og grabe nga kadaot.
Mihimo ang presidential sister sa pasidaan sa samang higayon nga ang South Korea nagpadayon sa pagpabuto niini duol sa utlanan sa duha ka Korea.
Gikuwestiyon usab niini nganong duol ra sa utlanan ang gipahigayon nga drill.
Matod sa presidential sister, kung matino sa NoKor nga ang drill sa SoKor usa ka paglapas sa soberanya niini, ug nga ang drill susama sa usa ka deklarasyon sa gubat, siya miingon nga ang militar sa North siguradong motubag.
Matod niya andam ang armadong kusog sa NoKor sa paghimo sa ilang misyon ug katungdanan base sa mga probisyon sa ilang konstitusyon.
Sa laing bahin, ang Defense Ministry sa SoKor mibarog nga lig-on ug miinsister nga magpadayon ang live fire drill, base sa gitino kaniadto sa gobyerno.
Bisan pa, wala gitino sa Ministry of Defense kung asa pa o kung kanus-a ipadayon ang pagpabuto.
