CEBU CITY — Gilibkas na ang “lockdown” sa Sitio Zapatera Barrio Luz ning dakbayan sa Sugbo.
Kagahapon, opisyal nga gi-lift ang “lockdown” sa lugar human nga nipatuman sa mga lakang ang lokal nga kagamhanan sa dakbayan sa Sugbo ingon man ang pangagamhanan sa Barrio Luz alang sa paglikay nga mokuyanap pa ang coronavirus.
Sa facebook post sa Cebu City Public Information Office, nipagawas na og memorandum si Mayor Edgardo Labella alang sa mga otoridad kalabot sa paglibkas sa “lockdown”.
Kahinumduman nga mo-abot sa 51 ka mga residente sa lugar nga kanhi positibo sa COVID-19 ang nakauli na sa ilang tagsa-tagsa ka panimalay gahapong adlawa human nag-negatibo og naka rekober sa sakit.
Ning kasamtangan anaa na sa mosobra usa ka gatos sa mga indibidwal sa dakbayan ang naka-rekober sa makamatay’ng sakit.
Tungod niini, nagpasalamat ang residente sa Sitio Zapatera sa nahimong kalambuan sa ilang lugar human nga gilibkas na ang gipatumang “lockdown” sa lugar.
Sa paghulagway sa residente nga si Rana Denuyo, daghan na matod pa ang posibleng nagplano nga mamalit sa gawas human sa taas-taas nga panahon nga gipa-ubos sila sa lockdown.
Hinuon magpabilin lang gihapon ang hugot nga pagpatuman sa palisiya sama sa usa lang ang tugutan nga mogawas aron mamalit og mag-asikaso sa mga importanteng katuyu-an sa gawas.
Samtang nagpasalamat usab si Denuyo sa Bombo Radyo Cebu nga nagsilbi nilang tulay sa ilang mga panawagan ngadto sa mga hingtungdang ahensiya sa lokal nga pangagamhanan sa syudad subay sa giatubang nga krisis sa coronavirus. (gn/gs/kep)
