TALISAY CITY,CEBU- Napalgang patay ang usa ka 64-anyos nga lalaki sa kasagingan nga nahimutang sa Purok Banana 1, Barangay Jaclupan, Talisay City pasado alas 9 sa buntag karong Adlawa, Biyernes, Agosto 15, 2025.
Giila ang biktima nga si Domingo Rabago, residente sa naasoy nga dapit ug nagtrabaho isip dispatcher sa mga jeepney nga nag-rota sa Camp 3 ug Camp 4 sa Barangay Tabunok.
Base sa inisyal nga impormasyon nga nakuha sa mga tanod sa maong lugar, si Rabago gidunggab sa daghang higayon, nga maoy hinungdan sa iyang kamatayon.
Sa interbyu sa Bombo News Team, mipadayag ang ex-live-in partner sa biktima nga si Corazon Abellana, 61 anyos, nga posibleng ang suspetsado mao ang anak sa kamagwangan nga igsuon ni Domingo — nga iyang pag-umangkon.
Gisaysay pa ni Abellana nga naglalis ang biktima sa maong pag-umangkon niadtong buntag sa insidente, pipila ka oras sa wala pa kini makita nga wala nay kinabuhi.
Padayon pa ang imbestigasyon sa kapulisan ug sa Scene of the Crime Operatives (SOCO) aron masuta ang motibo ug klaruhon ang tibuok detalye sa krimen.
