CEBU CITY-Gikatakda nga padalhan og showcause order sa LTFRB 7 ang operator sa Paladin tourist bus kansang nakabangga ug nakapatay sa duha ka mga batan-on sa Sitio Mohon, Barangay Langtad, dakbayan sa Naga.
Gitino ni LTFRB 7 Regional Director Eduardo Montealto, Jr. nga wala pa sila makadawat og report gikan sa operator sa naasoy nga tourist bus nga nalambigit kini sa usa ka aksidente.
Matud ni Montealto, ang tanang mga sakyanan nga malambigit og insidente sama na lang sa gikalambigitan sa maong tourist bus, gikinahanglan nga mopadangat og report sa ilahang buhatan sulod sa 72 ka oras alang sa lakang nga ilahang pagabuhaton.
Mismo ang naasoy nga opisyal ang nakadungog sa maong balita dinhi sa atong sibya-anan, apan hangtod karung mga higayona, wala pa sila nakadawat og report gikan sa operator sa maong tourist bus.
Gidugang pa ni Montealto nga ang tanang sakyanan lakip na ang mga tourist bus kay gi-‘require’ nga magbutang og dash camera sulod sa ilahang mga sakyanan.
Kini ang gitataw sa opisyal human nga usa sa mga reklamo sa pamilyang Rosada ug Canceran, nga susamang gibali ang report sa nahitabo nga disgrasya, apan walay footage nga gipakita gumikan kay wala may dash camera nga gipagawas gikan sa nalambigit nga tourist bus.
Gihimug-atan niini, kung ugaling mapamatud-an nga walay dash camera ang maong tourist bus, hayan, dugang kalapasan na usab kini sa operator.
Kahinumdoman nga patay ang 18-anyos nga si Klyde Morchie Rosada, 18-anyos, ug Johsua Diaz, 16-anyos, human nga nabanggaan sa Paladin tourist bus ang ilahang gisakyan nga motorsiklo, niadtong November 19, 2023.
Subo usab palandungon nga gikutlo ni Ritchie Rosada, amahan sa usa sa mga biktima, ang iyahang kaugalingong kinabuhi gumikan sa tumang kaguol ug kahi-ubos sa dagan sa hustisya alang sa iyahang anak.
