Gikalipay karon sa Land Transportation Office (LTO)-7 ang pag-abli sa ilang bag-ong extension office sa lungsod sa Balamban, Cebu.
Matud ni LTO-7 Director Victor Caindec nga masinati sa mga taga-Balamban ug sa mga kasikbit niining lungsod ang kumpletong serbisyo sa maong ahensya sama na lang sa pagkuha og driver’s license, ug uban pa.
Dugang pa niini nga susama sa mga serbisyo sa mga buhatan sa nag-unang syudad sa Central Visayas ang matagamtaman sa mga kliyente pinaagi sa ilang extension office.
Gibutyag usab ni Caindec nga naninguha kini nga madoble ang gidaghanon sa mga LTO offices sa tibuok rehiyon subay na sa hangyo sa katawhan ilabi na kadtong mga nanginahanglan sa maong serbisyo.
Apan gitataw niini nga dili ingon niana kasimple gumikan kay ipaagi kini og mga proseso ug adunay mga rekisitos alang niini.
Mitambong usab ang mga dinapit nga bisita atol sa soft opening sa LTO-7 Extension Office sa Balamban sama na lang ni Cebu Governor Gwendolyn Garcia.
