CEBU CITY — Gidagsa sa mga katoliko ang Mausoleum sulod sa Cebu Metropolitan Cathedral, dakbayan sa Sugbo, diin gilubong ang mitaliwan nga si kanhi-Arsobispo Ricardo Cardinal Vidal.
Matud sa BEC Coordinator sa Cathedral nga si Rose Cobol nga daghang mga tawo ang midu-aw sa lubnganan sa cardinal sukad nga gi-ablihan sa publiko ang mausoleum.
Gawas sa mga pag-ampo, nagdala usab og mga kandila ug buwak ang mga bisita sa mosoleyo isip pagtahud sa mga mitaliwan nga mga lider sa simbahan.
Nasayran nga gilubong sa musoleyo ang mga kapari-an ug mga obispo nga nag-alagad sa Arsobispo sa Sugbo.
Nagbantay usab ang mga sakop sa kapulisan sa palibut sa katedral subay na sa gipatumang hugot nga seguridad atol sa kalagkalag.
Nunot na sa paghandum sa adlaw sa mga patay, mipahigayon og misa si Archbishop Jose Palma sa musoleyo.
Mitaliwan ang labing impluwansyal nga lider sa simbahan nga si Cardinal Vidal niadtong Oktubre 18, 2017 sa edad nga 86 anyos.
