CARMEN, CEBU-Patay ang usa ka mabdos ug ang iyang wala pa matawo nga bata human naaksidente ang motorsiklo nga iyang gisakyan uban sa iyang live-in partner sa provincial road sa Barangay Corte, Carmen, amihanang Sugbo niadtong Lunes sa gabii, Septiyembre 11, 2023.
Matod sa taho sa kapulisan ang insidente sa sakyanan nga mikalas sa kinabuhi sa inahan ug sa iyang gisabak nahitabo mga alas 7:26 sa gabii.
Giila ang babaye nga si Nelia Tacocong, 36-anyos, mabdos, samtang ang drayber sa motorsiklo si Dennis Badatos, hingkod ang pangidaron, ug live-in partner sa namatay nga biktima.
Matod sa kapulisan nga ang duha ka biktima daling gidala sa Provincial Hospital sa dakbayan sa Danao aron matambalan. Apan, ang mabdos nga backrider gideklarar nga dead on arrival sa nag-atiman nga mananambal.
Sa kasamtangan, ang drayber anaa pa sa tambalanan nga nagpaalim sa samad sa iyang paa.
