CEBU CITY-Gipatuman sa Mactan Cebu International Airport ang mas higpit nga seguridad alang sa mga pasahero nga domestic ug international flights.
Hinungdan nga gikinahanglan na nga maghubo sa sapatos ang moagi sa x-ray machine ug sa inspection sa mga tinugyanan sa tugpahanan.
Mipadayag si Police Major Jerome Villegas, Hepe sa Aviation Security Group sa MCIA Police Station, nga ang hugot nga pagpatuman sa seguridad sa tugpahanan agig sunod sa international standard.
Kini human makadawat ang MCIA sa Airport Customer Experience Accreditation gikan sa Airports Council International (ACI) diin maoy unang tugpahanan sa nasud nga nakadawat sa mao’ng estado.
Giklaro ni Major Villegas nga walay nadawat nga hulga ang MCIA nga angay ikabalaka ug igo lang nagpalig-on sa seguridad arun magpabilin ang dakong pagsalig sa mga pasahero nga luwas kini nga moanhi sa Sugbo.
