Gipasabot ni Engr. Oscar Tabada, ang kanhi Regional Director sa PAGASA Central Visayas, nga ang buwan sa Abril, mao ang pinaka-uga nga buwan sa tibuok panuigan, diin ang nabibit nga average nga uwan niini 5 ra ka adlaw sulod sa 30 ka adlaw.
Dugang pasabot ni Tabada nga nihit ang uwan rong buwana, hinungdan nga kung adunay gituohang nagpundok nga panagdag-om, gitawag lang kana nga early evaporation.
Mao kini ang gipasabot ni Tabada, atol na sa eksklusibong pakighinabi sa Bombo Radyo Cebu team kaniya, ug ingun man iyang gitataw nga ang maong early evaporation nga nagpasabot gisuyop na daan ang tubig gikan sa babaw sa wala pa kini maabot sa yuta.
Dugang pagpasabot ni Tabada, na-obserbaran nga ang heat index sa kasamtangan, nagka-anam og kataas.
Diin dinhi sa Sugbo, dili susama ang nasinating heat index didto sa Luzon, ug ubang bahin sa Western Visayas tungod kay sa Sugbo, ni average lang kini og 37-38 ug wala pa niabot anang 40 nga heat index, kinsa makonsiderang lebel nga delikado na sa katawhan ug kalikopan.
Busa, giklaro niya nga ang kainit sa panahon nga nasinati karon magapdayon pa sa kinatibuk-ang buwan sa Abril ug molungtad hangtud sa buwan Mayo gumikan kay ang Mayo, mao ang buwan nga pinakainit usab nga buwan sa tibuok tuig. Ingun man malaomon si Tabada nga “unta” motumaw na ang 5 ka adlaw nga uwan para maminusan ang kainit nga nasiti sa katawhan.
Hinuon, gibutyag usab ni Tabada nga basi sa forecast sa PAGASA, ang buwan sa Mayo aduna nay daghan adlaw nga makasinati og pag-uwan, ilabi na sa katapusang semana niini gumikan kay mobali na ang hapak sa hangin nga gikan sa Amihan adto na sa Habagat.
