Saulogon sa duha ka adlaw nga kalihokan sa mga supporters ni kanhi Presidente Rodrigo Duterte ang iyang adlaw nga natawhan karong Marso 28, diin gipangulohan sa grupong Hakbang ng Maisug-Cebu Chapter.
Mao kini ang gipaambit ni EB Jugalbot, usa sa mga lead convenor sa Maisug Cebu diin karong adlawa, Marso 27 kay usa ka mañanita ang himoon sa mga supporters sa boardwalk sa Danao City.
Kini gumikan importante ang naasoy nga dakbayan sa kanhi tungod kay didto gikan ang ilang pamilya.
Sugdan ang unang adlaw sa kalihokan karong adlawa, Marso 27 ala 1 sa hapon diin adunay libreng pag-imprinta og t-shirt gamit ang bag-ong mga desinyo nga adunay nakasuwat nga ‘bring him home’ nga nagpasabot ni Duterte nga anaa karon sa detention facility sa International Criminal Court sa The Hague, Netherlands.
Ang mga supporters nga gustong mag-imprinta magdala lang og kaugalingon nga t-shirt ug libri na ang imprinta.
Samtang sa pagtakdo sa alas 6 sa gabii kay adunay himoon nga mga entertainment gikan sa mga local nga mga performers sa Danao City ug sugdan ang main program sa pagtungtong sa alas 10 sa gabii nga mao ang mañanita.
Samtang sa Marso 28, ang adlaw nga natawhan ni Duterte diin himoon na ang birthday tribute sa mga supporters sa Pasilong sa Paradise sa barangay Guizo sa dakbayan sa Mandaue.
Usa usab kini sa mga napili nga lugar tungod kay mao kini ang katapusan nga pagtambong ni Duterte ug kalihukan sa Sugbo nga mao ang prayer rally sa dakbayan sa Mandaue niadtong Pebrero 22.
