Wala pa’y nakitang hulga ang Malacañang sa “energy lockdown” o kakulangon sa suplay sa kuryente ug lana sa nasud bisan pa sa nagkagrabe nga panagbangi sa Middle East.
Sumala ni Palace Press Officer Undersecretary Claire Castro, ang nasud karon layo na sa sitwasyon sama sa 1970s diin adunay fuel rationing ug carless days.
Sumala sa Palace official, isip kabahin sa contingency plan sa administrasyong Marcos Jr., ang Department of Energy (DOE) ug ang Department of Foreign Affairs (DFA) aktibo nga nangita og alternatibong tinubdan sa petrolyo nga wala magsalig sa Middle East.
Gikutlo ni Castro ang report ni DOE Undersecretary Sharon Garin nga ang Pilipinas karon nakig-diyalogo sa mga nasud sama sa India, Argentina, ug Canada aron masiguro ang padayon nga imbentaryo sa lana sa nasud.
Dugang ni Castro nga samtang ang gobyerno naglaum alang sa usa ka diplomatikong resolusyon tali sa mga nasud nga nag-away, ang Presidente wala mohunong sa mga pagpangandam aron mapugngan ang bisan unsang pinakagrabe nga senaryo nga magpahinabog kalisud sa mga Pilipino.
