CEBU CITY-Gihulagway sa Kapulisan sa dakbayan sa Sugbo nga malinawon ug hapsay ang pag saulog sa Sugbo sa ika 125th nga Kaugalingnan sa nasud, diin kapin sa duha ka gatus ka police ang gipakatap sa kadalanan.
Matod ni Police Colonel Ireneo Dalogdog ang hepe sa Cebu City Police Office nga moabot sa 220 ka mga police personnel ang gipakatap sa kadalanan aron moabag sa mga sakop sa Cebu City Transportation Office kun CCTO tungod kay adunay mga karsada ang gipang sirad-an nga ma agi-an sa parada.
Gidungang sa opisyal nga human sa mga kalihukan iyahang gipangtawagang ang mga hepe sa kapulisan sa Sugbu, ug iyang nasuta nga walay untoward incident nga nahitabu atol sa Selebrasyon.
Dugang pa, nga kini gumikan usab sa sub-sub nga pagpangandam sa kapulisan ug ubang departamento sa kagamhanan sa dakbayan sa Sugbo hinungdan nga malampuson, malinawon ug hapsay ang maong kalihukan nga walay natala nga krimen sa matag police station sa dakbayan.
Samtang, gipadayag usab police director nga alas 3 pa lang sa kaadlawon nag walk through na ang kapulisan sa dakbayan sa Sugbo uban ni Cebu City Mayor Michael Rama sa ruta sa parada gikan sa Fuente Osmeña rotunda paingon sa Plaza Independencia agi sa General Maxilom Avenue aron masiguro nga hapsay ug hamugaway ang kalihukan.
