Sikop ang duha ka manag-igsoon sa posesyon sa illegal nga drugas pinaagi sa buy-bust operation didto sa Purok Ypil-ypil, Sitio Tiltilon, Brgy. Cotcot, sa dakbayan sa Liloan.
Nahitabo ang maong operasyon sa mga awtoridad niadtong adlaw sa Lunes Hunyo 10, ning kasamtangang tuig.
Giila ang mga dinakpan nga sila JESSIE alias “Jes” GALLARDO SAYUD, 44-anyos ug si GLENDO GALLARDO SAYUD, 48-anyos og polos residente sa Lagtang, ning dakbayan sa Talisay.
Gipahigayon ang maong pagdakop sa mga kapulisan sa Liloan Municipal Police Station uban sa koordinasyon sa Philippine Drug Enforcement Agency Central Visayas (PDEA-7).
Nasikop sa mga suspek ang 19 ka mga pakete sa giilang shabu sa nagkalain lain gidagkuon, 1,000 pesos cash ug laing 500 pesos cash isip marked money sa operasyon.
Mukabat sa kapind 30.65 ka gramo sa shabu and nakumpiska nga mudagan sa balor nga Php 208,420.00.
Kasamtangan anaa sa kustodiya sa kapulisan sa lungsod sa Liloan ang naasoy nga mga suspek.
