CEBU CITY — Nabalhog sa prisuhan ang manag-uyab human makuhaan og dul-an 3-milyones pesos nga kantidad sa shabu atol sa buybust operation sa Sitio Cogon, Brgy. Labangon, dakbayan sa Sugbo.
Giila ang high-value-target nga si Edilyn Cabarse, 34 anyos, samtang ang kapuyo niini mao si Jona Gonzales, 41 anyos, ug parehong nagpuyo sa nahisgutang dapit.
Matud sa hepe sa Drug Enforcement Group (DEG) – Visayas nga si Police Lieutenant Colonel Glenn Mayam nga anaa lang sa Cebu City ang transaksyon ni Cabarse.
Midepensa si Gonzales nga karon pa sila nakabuhat sa maong transaksyon ug wala kini masayud nga shabu diay ang ilang gibitbit.
Nakuhaan ang duha og 400 gramos sa gidudahang shabu ug nagkantidad kini og P2.7-million.
Anaa sa detention cell sa Philippine Drug Enforcement Agency (PDEA)-7 ang duha ug mag-atubang og kasong kalapasan sa Sections 5 ug 11 sa Comprehensive Dangerous Drugs Act. (gn)
