CEBU CITY – Giingong na-link sa top drug lord kinsang napatay nga si Franz Sabalones ang nasikop sa buybust operation nga gipahigayon sa Talisay City.
Nadakpan ang managsoon nga giilang si Edwin Kyamko, 54 anyos, ug Jannette Kyamko, 53 anyos atol sa operasyon nga gipasiugda sa Talisay City PNP ug Provincial Drug Enforcement Unit (PDEU).
Matud ni Police Capt. Alejandro Batobalonos, ang hepe sa PDEU, nga dugay na kini nga naa sa ilang watchlist kung diin mugawas pa ang pangalan niini sa mga durugista nga ilang madakpan.
Dagko matud pa ang transaction niini hinungdan nga naglisod sila sa pagsikop apan sa dihang miingon kini nga makahatag sila og 30 gramos nga drogas ila dayon nga gipahigayonan og operation.
Nakuhaan ang managsuong Kyamko og mga binulto nga shabu ug mikabat kini og P258,000.
Nasuta nga ang supplier sa duha ka managsoon anaa sa Brgy. Pasil, Cebu City apan wala kini mitug-an og si kinsa ug bisan matud patyon sila wala silay ikasulti kay wala matud pa sila nakaila.
Gikompirmar usab ni Batobalonos nga ang supplier sa magsoon sa una mao si Franz Sabalones apan nahunong kini sanglit wala na matud pa nakabayad ang duha ngadto ni Franz.
Padayon karong giimbestigahan ang tinubdan sa shabu nga nasakmit gikan sa duha ka dinakpan. (FDP)
