CEBU – Wala mugamit ug dinamita sa ilahang paglawig sa kadagatan ang mga mananagat nga giingong napusilan sa usa ka pulis nga na-assigned sa Mabini Police Station sa probinsiya sa Bohol.
Kini ang depensa ni Jimmy Vallente, ang igsuon ni Noel Vallente kinsang na-igo sa pagpamusil ni Police Staff Sergeant Joel Bayron, atol na sa eksklusibong pakighinabi sa Bombo Radyo Cebu.
Gisaysay ni Vallente nga igo lang sila nanginhas niadtong higayona ug mibalik sa kadagatan gumikan kay aduna mi-order kanila.
Matud pa, alas 4 sa hapon paingon na silang mama-uli, giingong nakasugat nila ang usa ka sakayan diin sakay si SSgt. Bayron ug sa dihang nagkaduol nila, kalit kining namusil sa makadaghang higayon.
Dugang pa niini, na-igo sa wala nga dunggan ang iyahang igsuon nga si Noel hinungdan nga natagak kini sa sakayan ug naluwas na lang sa usa mamasolay.
Giingong sa dihang nadala si Noel sa tambalanan, mi-abot ang kapulisan ug gipusasan kini bisan pa man nga nagkadugo pa ug nagta-op pa ang bala sa dunggan, samtang naghigda kini sa hospital bed.
Sa pagkakarun, gi-asuy ni Vallente nga anaa pa iyahang igsuon sa ospital gumikan kay wala pa nakuha ang bala gikan sa dunggan niini.
Gitino sa naasoy nga reklamante nga gusto nilang mupasaka ug kaso batok sa naasoy nga pulis, apan giingong wala sila’y igong kwarta arun kini nga ipahigayon.
