PROVINCE OF BOHOL- Nasikop ang usa ka 61-anyos nga mananagat tungod sa giingong ilegal nga pagbaligya og diesel fuel sa kadagatan duol sa Ubay Island, Tubigon, Bohol, niadtong udto sa Huwebes, Agosto 20, 2026.
Gidakop sa mga miyembro sa Bohol Maritime Police ug Provincial Intelligence Unit sa Bohol Police Provincial Office ang suspek atol sa gihimong buy-bust operation.
Giila sa kapulisan ang suspek nga si alyas Jose, usa ka mananagat ug residente sa Purok 1, Ubay Island, Tubigon.
Nasakmit gikan sa suspek ang 14 ka dagkong sudlanan nga adunay diesel fuel nga gibanabanang nagkantidad og P14,000. Nakuha usab sa mga operatiba ang usa ka motorized banca nga giingong gigamit sa pagdala sa diesel fuel.
Matod sa kapulisan, gisugdan ang imbestigasyon human sila makadawat og impormasyon nga si Jose giingong ilegal nga namaligya og gasolina sa maong lugar.
Atol sa buy-bust operation, giingong gibaligya ni Jose ang diesel fuel ngadto sa usa ka undercover buyer, nga misangpot sa iyang pagkadakop.
Nag-andam ang kapulisan og kasong paglapas sa Batas Pambansa Bilang 33, nga gi-amyendahan sa Presidential Decree No. 1865, batok sa suspek.
Si Jose anaa karon sa kustodiya sa kapulisan samtang gihulat ang pagpasaka sa kaso batok kaniya.
