CEBU CITY — Gipatuman na sa dakbayan sa Talisay ang mandatory nga pagsul-ob sa face mask sa tanang publiko nga lugar nunot na sa gipatumang enhanced community quarantine sa lalawigan sa Sugbo.
Kini human nga niluwat og kamanduan si Talisay City Mayor Gerald Anthony “Samsam” Gullas may labot na sa maong mandato aron kalikayan ang pagkuyanap pa sa COVID-19.
Matud ni Gullas nga dili tugutang makasulod ang mga indibidwal sa mga publiko ug pribadong establisimento ang kinsang dili magsul-ob og facemask para dili mokatap ang kagaw.
Samtang gikinahanglan nang magdala o mosul-ob ang mga Talisaynon og quarantine pass aron makapalit sa mga nag-unang palaliton sa gawas.
Apan exempted hinuon sa maong kamanduan ang mga medical workers basta aduna silay ikapakita nga company ID inig sulod na sa mga establisimento.
Gimanduan na karon ni Gullas ang mga kapulisan alang sa striktong implementasyon niini ug sitahon ang kinsang makalapas niini.
