MANDAUE CITY,CEBU- Padayon nga nagpatuman ang Mandaue City Jail–Male Dormitory (BJMP–Mandaue) og nagkadaiyang mga programa ug inisyatibo aron mapauswag ang kaayohan ug rehabilitasyon sa mga Persons Deprived of Liberty (PDL).
Sa pakighinabi sa Bombo Newsteam kang JSupt. James D. Gingoyon, Warden sa BJMP–Mandaue City, nagtuo ang administrasyon nga matag indibidwal adunay katungod sa ikaduhang higayon aron bag-ohon ang kaugalingon ug magsugod pag-usab.
Usa sa mga nag-unang inisyatibo mao ang College Behind Bars, nga sa pakigtambayayong sa Mandaue City College nagtugot sa mga kwalipikado nga PDL nga makapadayon sa mas taas nga edukasyon. Ang programa naghatag og oportunidad sa pagkuha og degree sa BS Business Administration ug BS Information Technology, nga planong magsugod sa Hunyo 2026.
Dugang pa, gipalapdan usab ang mga bokasyonal ug kahanas nga pagbansay sama sa pagpamanday, welding, pagproseso sa pagkaon, digital literacy, ug entrepreneurship aron mas maandam ang mga PDL sa legal ug mapuslanong panginabuhian.
Gihatagan usab og prayoridad ang mental health ug psychosocial support, lakip ang counseling, stress management, ug values formation, aron mapalambo ang emosyonal nga kaayohan ug makunhuran ang pagbalik sa bisyo.
Padayon usab ang mga sports clinic ug tournaments sa futsal, basketball, ug volleyball, lakip ang partisipasyon sa Sinulog Cup, nga nagtumong sa pagpalig-on sa pisikal nga kahimsog, disiplina, panaghiusa, ug sportsmanship.
Gihatagan og gibug-aton ni JSupt. Gingoyon, nga ang BJMP–Mandaue, ang prisohan dili lang lugar sa pagkabilanggo, kondili sentro sa paglaum, pagkat-on, ug ikaduhang higayon.
