Nagkainitay sila si Senador Rodante Marcoleta ug Department of Justice (DOJ) Secretary Jesus Crispin Remulla sa isyu sa “restitution” o pagbalik sa mga kinawat nga pundo gikan sa anomalosong flood control projects, nga iapil sa Witness Protection Program (WPP).
Ang isyu sa pagpaubos sa WPP ngadto sa daghang resource persons nga nitambong sa Senate hearing tungod sa mga hulga sa ilang seguridad, apil na ang magtiayong contractor sa gobyerno nga sila Curlee ug Sarah Discaya, kinsa mibutyag sa giingong “kickback” sa proyekto.
Samtang nagpadayon ang imbestigasyon sa Senate Blue Ribbon Committee sa mga anomalosong flood control projects karong Martes, Septiyembre 23, si Senador Marcoleta subling mipahimangno sa gituki sa miaging hearing sa komite bahin sa restitusyon, nga dili rekisito o kondisyon aron maapil sa programa, apan si Sec. Remulla mitubag nga wala kini sa balaod.
Gipasabot sa kalihim nga ang pag-uli dili kabahin sa mga rekisitos alang sa pagsulod sa WPP, butang nga giuyonan ni Marcoleta.
Hinuon gitataw sa kadagkoan sa DOJ nga wala kini magpasabot nga dili na nila kini tagdon tungod kay depende na kini sa kaso.
Giinsister ni Marcoleta nga adunay proseso diin ang restitution dili rekisitos alang sa aplikasyon sa WPP, apan sumala ni Sec. Remulla, usa kini ka krimen batok sa financial status sa Filipino citizen, busa matod niya nga angayan lang kining hangyoon.
Dinhi gikuwestiyon ni Marcoleta ang pagsuway ni Remulla sa pag-amendar sa probisyon sa balaod nga hugot nga gihimakak sa kadagkoan sa DOJ.
Nangatarungan usab si Senador Marcoleta nga kung mapamatud-an nga adunay criminal liability ang usa ka tawo ang “restitution” maapil ug isip rekisitos o kondisyon aron maapil sa Witness Protection Program (WPP).
Matod sa Senador, kinahanglang adunay “goodwill” ug sinseridad aron masulayan kung angayan bang maapil sa programa.
Sa laing bahin, si Sec. Remulla niingon nga iyang girespito ang opinyon sa Senador, diin giklaro dayon ni Marcoleta nga dili kini iyang opinyon kondili anaa sa balaod.
Tataw nga gipahimangnoan ni Marcoleta ang kalihim nga mamahimong ma-disbar si Remulla tungod sa isyu sa pag-usab sa probisyon sa balaod.
Samtang, sa samang hearing, si Committee Chairperson Sen Panfilo “Ping” Lacson kon duna pay laing mga resource person gawas kang kanhi Bulacan 1st District Engineer Henry Alcantara nga gikonsiderar nga maapil sa maong programa, ang kalihim nitubag nga ilang susihon ang tanang ebidensiya nga ilang gipresentar ug kinsa kanila ang makatumbok sa mga sad-an sa anomalosong proyekto.
