Gikompirmar ni Presidente Ferdinand Marcos Jr., nga ang tanang flood control projects para sa fiscal year 2026 gisuspenso.
Nipahibalo ang Presidente nga ang budget alang sa flood control projects i-realign sa edukasyon, agrikultura, panglawas, housing, infra, ICT, labor, social, energy ug uban pa.
Kalabot niini, ang presidente niingon nga nihimo sila og “menu” o listahan sa mga ahensya ug programa, nga makabenepisyo sa gisugyot nga pundo alang sa flood control projects, diin ang “menu” magsilbi nga giya sa mga magbabalaod sa paghimo og mga kausaban sa budget.
Una nang niingon ang presidente nga ang mga flood control projects makadawat og “zero budget” o walay alokasyon ubos sa proposed 2026 budget, tungod kay aduna pay P350-billion nga nahabilin ug wala magamit ubos sa kasamtangang budget.
Matod pa nga kini usa ka unang lakang ngadto sa mas klaro nga transparency ug accountability sa alokasyon sa pundo sa gobyerno, nunot sa bag-o nga mga isyu mahitungod sa mga iregularidad sa paggasto sa mga proyekto sa imprastraktura.
Bisan tuod walay bag-ong pondo nga gigahin alang sa flood control projects sa nasudnong budget para sa 2026, si Presidente Marcos niklaro nga ang PhP350 bilyones nga gigahin alang sa 2025 kinahanglan una nga hingpit nga magamit sa dili pa ang mga bag-ong lakang himoon.
Ang pagkansela sa mga proyekto sa pagpugong sa baha ug ang pag-andam sa usa ka prayoridad nga plano sa paggasto nagsunod sa pagmugna sa Presidente sa Independent Commission for Infrastructure (ICI) nga magtutok sa pag-imbestiga sa mga anomaliya sa mga proyekto sa pagpugong sa baha sa milabay nga napulo ka tuig.
