Nangatarongan ang beteranong abogado nga si Atty. Romulo Macalintal nga si Mary Jane Veloso, kinsa bag-o lang gi-turn over sa Pilipinas human sa kapin 14 ka tuig nga pagkapriso sa Indonesia human gisentensiyahan og kamatayon tungod sa ilegal nga drugas kay kinahanglang buhian sa kustodiya sa bisan unsang ahensya sa gobyerno sa Pilipinas.
Gitataw usab ni Macalintal nga dili magamit sa nasud ang mga kasong pagpayuhot sa drugas nga gipahamtang batok kang Veloso sa Jakarta.
Matod niya, ang bisan unsang benepisyo nga ihatag sa gobyerno sa PH ngadto kang Veloso subay sa kasabotan sa pagbalhin niini sa gobyerno sa Indonesia ilabi na sa pagpadali sa malampusong reintegrasyon o pagbalik sa katilingban sa usa ka tawo nga nasentensiyahan.
Hinuon, samtang wala pa ang Presidente sa maong lakang, angayan nga buhian si Veloso tungod kay wala siya nag-atubang og bisan unsang kaso sa nasud ug walay warrant of arrest nga giluwatan batok kaniya gikan sa bisan asang korte sa Pilipinas.
Gihisgutan usab ni Atty. Macalintal ang 2010 Department of Justice Circular No. 90 partikular nga usa ka probisyon sa sirkular, Seksyon 18 nga nag-ingon nga ang estado lamang nga mihatag sa sentensiya, subay sa konstitusyon ug mga balaod niini, ang mahimong mohatag og pardon, amnestiya o pag-commutation sa sentensiya. Apan ang nagdumala nga estado mahimong mohangyo gikan sa sentencing state alang sa award sa pardon, amnestiya o pag-commutation sa sentensiya pinaagi sa pagsumite sa aplikasyon nga adunay igong basehan.
Dugang pa ni Macalintal nga tungod sa maong kasabotan, ang gobyerno sa Indonesia nihatag sa hangyo sa PH government alang sa kagawasan ni Veloso ug gipabalik kini sa nasud.
Gipasabot pa niya nga karon nga gitugyan na sa gobyerno sa Indonesia ngadto sa gobyerno sa PH ang pagbuhat sa ilang gihunahuna nga makaayo alang kang Veloso, matud niya dili kini magamit ni Presidente Ferdinand Marcos Jr. iyang pardoning power ubos sa Konstitusyon tungod kay ang maong gahom magamit ra sa mga kriminal nga nakonbikto ubos sa balaod sa PH ug matud niya walay hurisdiksyon ang atong nasud sa mga krimen nga nahimo sa usa ka Filipino sa gawas sa nasud.
Gihimo sa abogado ang maong pamahayag taliwala sa mga panawagan nga pasayloon si Veloso apan matod ni Presidente Ferdinand Marcos Jr. nga tun-an ang posibleng clemency ni Veloso.
