CEBU CITY-Naalarma karon ang dakbayan sa Sugbo human sa mikatap sa social media kabahin sa mga king cobra sa pipila ka lugar nga hingpit nga gikahadlokan gumikan lagmit kining mopatay og kinabuhi.
Sa pakighinabi sa Bombo Radyo Cebu News Team kang Dr. Alice Utlang gibutyag niini ang pipila ka mga posibleng hinungdan sa sunod-sunod nga taho kabahin sa mga mitumaw nga mga king Cobra.
Matud niini nga ning buwana mao ang mating season ug ang uban niini, nangita og pagkaon.
Sa pikas bahin, gipahimangnoan sa buhatan sa Department of Environment and Natural Resources 7 nga usa ka talagsaon nga higayon ang pagtumaw sa mga Cobra hinungdan nga ang katawhan giawhag sa pagtimaan sa balaod nga Republic Act No. 9147 alang sa pagprotekta sa mga wildlife resources.
Gihimug-atan usab niini nga kon gani madakpan sa paglapas sa maong balaod, mag-atubang kini og tukmang silot.
