CEBU CITY- Nagtigom ang tanang kapitan sa 80 ka barangay alang sa 3rd Quarter Assembly sa Liga ng mga Barangay–Cebu City Chapter kaniadtong Agosto 5, 2025.
Sa iyang mensahe, gipasiugda ni Cebu City Mayor Nestor Archival ang kahinungdanon sa panaghiusa ug koordinasyon tali sa barangay ug city government.
Gidugang niya nga ilang gipaningkamotan nga mas mapaabot dayon ang serbisyo publiko sa katawhan pinaagi sa lig-on nga kolaborasyon.
Gipangayo usab sa mayor ang suporta sa mga barangay alang sa padayon nga clean-up drive, mga road asphalting projects, ug sa konstruksyon sa Pulangbato Bridge nga sugdan na karong sunod semana.
Gipasigarbo usab niya ang nagpadayong solar-powered projects sa siyudad, lakip na ang streetlights ug ang solar conversion sa ABC building.
Samtang si Vice Mayor Tommy Osmeña mipahibalo sa iyang bag-ong programa nga gitawag og “Mayor of the Night”, nga gilaraw aron motabang sa mga BPO workers pinaagi sa 24/7 government services ug libreng sakay sa gabi-i.
Si Councilor Paul Labra II, Chairman sa Committee on Peace and Order, nituki sa kampanyang “Oplan Pakigsandurot”, usa ka anti-criminality drive nga ipatuman uban sa mga barangay.
Ang maong kalihukan gipangulohan ni Councilor Franklyn Ong, presidente sa Liga ng mga Barangay–Cebu City Chapter, uban sa ubang konsehal sa dakbayan.
