Gipadisbar ni Acting Davao City Mayor Baste Duterte ang pipila ka dagkong opisyal sa nasud nga sila si Department of Justice Sec. Jesus Crispin ‘Boying’ Remulla, Defense Sec. Gibo Teodoro, Justice Usec. Felix Ty, ug Prosecutor General Richard Anthony Fadullon.
Isip legal counsel sa mayor, si Atty. Israelito Torreon kay personal nga gisang-at sa disbarment complaint batok sa nahisgutang mga opisyal ngadto sa Korte Suprema.
Matod sa abogado, ang pagpasaka sa kaso sa disbarment gibase sa kapasidad sa mayor isip kabahin sa pamilyang Duterte.
Bisan tuod si Atty. Torreon nagdumili nga ipaambit ang unod sa dokumento, matod niya nga may kalabotan kini sa pagdakop ug pagbalhin ni kanhi Presidente Rodrigo Roa Duterte sa The Hague, Netherlands.
Gikan niini, si Department of Justice Sec. Jesus Crispin ‘Boying’ Remulla igo lang gikonsiderar nga ‘forum shopping’ ang giingon nga disbarment complaint.
Diin matod niya kini gipaabot na niya daan ilabina gikan sa kampo sa mga Duterte.
Matud usab niya nga dili kini ang unang higayon nga nakadawat siya og reklamo o kaso gikan sa maong abogado.
