LAPU-LAPU CITY-Gikaloy-an ni Lapu-lapu City Mayor Ahong Chan ang mga kapitan nga matud pa gigamit sa wala pa ‘ka move on’ sa pulitika nga si kanhi Lapu-lapu City Mayor ug karon Cong. Paz Radaza.
Kini human usab nga mayorya sa mga kapitan sa naasoy nga dakbayan ang mi-file og kaso batok kang Chan ngadto sa ombudsman kalabot sa pagpahawa niini ni Radaza sa mayor’s office butang nga hangtud karon nagmagahi pa ang kanhi mayor sa paghawa.
Matud ni Chan sa pakighinabi sa Bombo Radyo Cebu nga nalooy matud pa siya sa mga kapitan nga gigamit ni Radaza, inay nga mas pokosan niini ang mga problema sa ilang tagsa-tagsa ka mga barangay, mas gi-atupag man hinoon ang pagpagamit sa kanhi mayor.
Gihimug-atan ni Ahong nga duna nama’y legal opinion nga gikan sa DILG nga wala nag-ingong wala nay authority si Radaza sa mayor’s office tungod kay dili na kini mayor apan wala pa matud kini maka move on ug nagpasaka na usab og kaso.
Pagtino sa mayor nga iya na kining gikalimtan ang maong issue tungod kay daghan og problema ang dakbayan nga iyang gi-atubang karon sama sa baha, basura, hospital merkado ug uban pa. Mas importante matud pa ang pagsulbad sa mga problema sa dakbayan kaysa tagaan og pagtagad ang naasoy nga issue.
Hangyo ni Chan karon sa mga kapitan nga tabangan siya para sa ikalambo sa siyudad ug sa oponganons ug dili na magpagamit.
Dason pa usab ni Chan nga angayang respetoon ang DILG.
