PROVINCE OF CEBU- Midipensa si Mayor Efren “Gungun” Gica sa lungsod sa Dumanjug sa lokal nga kontraktor nga QM Builders, taliwala sa nasudnong pagsusi human kini maila sa presidente nga usa sa top 15 nga kontraktor nga gihatagan og multi-billion-peso nga flood control projects sa tibuok nasud.
Sa iyang pamahayag, gipasiugda ni Gica ang dako nga natampo sa QM Builders sa kalamboan sa lungsod.
Gidugang niini, nga ang kompanya, nga gipanag-iya ni Engineer Allan Quirante ug nakabase mismo sa Dumanjug, naghatag og trabaho sa gibana-banang 6,000 ka mga residente.
Gipanghimakak sa mayor ang mga alegasyon sa mga “ghost projects,” ug giinsistir nga ang tanang proyekto sa munisipyo miagi sa hustong proseso pinaagi sa Bids and Awards Committee ug subay sa balaod sa public procurement.
Gipadayag usab ni Gica nga andam siya nga mopasa og resolusyon sa konseho aron ipakita ang opisyal nga suporta sa QM Builders, ilabina sa ilang dugang nga tabang nga wala na magkinahanglan og pondo sa gobyerno.
Sa laing bahin, nanawagan si Cebu Governor Pamila “Pam” Baricuatro sa Department of Public Works and Highways (DPWH) nga ihatag sa Kapitolyo ang usa ka komprehensibong listahan sa tanang flood control projects sa tibuok probinsya.
Gihatagan og gibug-aton sa gobernadora ang panginahanglan sa transparency ug accountability sa pagpatuman sa mga dagkong proyektong pang-imprastruktura.
