Nanhinaot si Pamplona, Negros Oriental Mayor Janice Degamo nga makabalik na sa Pilipinas si kanhi Negros Oriental Representative Arnolfo Teves Jr.
Kini bisan pa sa pagsalikway sa lokal nga korte sa Timor Leste sa hangyo sa Pilipinas nga ibalik ang gitaktak nga magbabalaod nga maoy nag-unang suspek sa pagpatay kang kanhi NegOr Gov. Roel Degamo ug uban pa.
Matod sa asawa sa napatay nga Gobernador, nagtuo gihapon siya nga buhaton sa gobyerno sa Pilipinas ang tanan aron mahibalik sa nasud ang pugante.
Ingon man nga naglaum usab kini nga sa kadugayan atubangon ni Teves ang iyang daghang kaso sa mga lokal nga korte dinhi sa Pilipinas.
Nunot sa desisyon sa lokal nga korte sa maong nasod, si Degamo niingon nga dili usab niya malikayan nga maghunahuna nga naimpluwensiyahan ang korte.
Sa laing bahin, gikatakdang makigtagbo ang mayor kang Department of Justice Secretary Jesus Crispin Remulla sunod semana.
Kini aron hisgutan ang desisyon sa lokal nga korte sa Timor Leste ug planohon ang sunod nga lakang sa gobyerno aron hingpit na nga makauli si Teves.
Sa Pilipinas, si Teves nag-atubang og daghang kaso sama sa 10 counts of murder, 14 counts sa frustrated murder ug upat ka counts sa attempted murder kalabot sa Degamo assassination.
