Nipadayag sa iyang kasagmuyo si kanhi Independent Commission for Infrastructure Special Investigator ug Baguio City Mayor Benjamin Magalong, kabahin sa kadugay sa panahon nga gigahin sa pag-imbestiga sa mga anomalosong proyekto sa pagkontrol sa baha.
Sa usa ka pahayag, ang mayor miingon nga ang hinay nga pag-uswag sa imbestigasyon makapahigawad, tungod usab sa iyang giingon nga kakulang sa gahum sa komisyon sa pagpanubag sa mga naa sa luyo sa kaylap nga korapsyon.
Ang mayor naghatag og ehemplo sa usa ka wala nganli nga personalidad nga kaniadto giimbitar sa komisyon aron ipasabut ang nabutyag nga iskandalo sa pagkontrol sa baha, apan bisan pa sa iyang taas nga posisyon, siya miingon nga wala kuno silay nakuha nga impormasyon gikan kaniya.
Gipasiugda sa mayor nga kung ang mga indibidwal nga nalambigit sa iskandalo dili mapugos sa pagsulti o pagdala og mga dokumento, siguradong mag-atubang sila og mga kalisud sa nagpadayon nga imbestigasyon, ug nidugang nga gikinahanglan ang dugang nga gahum alang sa nahisgutang komisyon aron mas epektibo niini nga matuman ang mga katungdanan niini.
Mahinumduman nga ang mayor nakahukom nga mo-resign sa iyang posisyon human sa mga pahayag gikan sa Malacañang nga giingong nagkuwestiyon sa iyang kredibilidad ug papel isip mayor ug imbestigador sa komisyon.
