CEBU CITY-Nipadayag si Cebu City Mayor Michael Rama sa iyang suporta kang Cebu Governor Gwen Garcia atol sa flag ceremony sa Plaza Sugbo grounds Lunes, Septiyembre 4, 2023.
Matod ni Rama nga nakighinabi siya kang Gobernador Garcia niadtong Domingo sa gabii, Septiyembre 3, bahin sa iyang biyahe sa Russia.
Dugang sa Mayor nga gisultihan niya ang gobernador nga moadto siya sa Vladivostok sa Russia alang sa usa ka speaking engagement.
Gipaambit niini nga maapil siya sa usa ka economic forum ug adunay siyay “daghang mga miting” nga tambongan.
Bisan pa, wala niya gitino kung kanus-a mahitabo kini nga pagbiyahe.
Bag-o lang usab kining miabot gikan sa iyang biyahe gikan sa Amerika aron dawaton ang iyahang Lifetime Achievement Award sa Hollywood’s America Excellence Awards niadtong Agosto 20 sa Hollywood, California, USA.
Samtang gahapong, adlawa mibiyahe sa kauluhan si Rama aron makigtagbo sa mga investors ug pagsusi sa pagpangayo og updates sa ilang investments sa dakbayan.
Kung kahinumduman, nga gisugdan niya ang iyang “invest begging” niadtong Agosto 2022, aron makadala ug mas daghang investors ug aron makab-ot ang iyang pangandoy nga makabaton ug siyudad nga sama sa Singapore.
